Bəşər tarixində insanlığa qarşı törədilən ən ağır cinayətlərdən biri olan 20 Yanvar faciəsi qurbanlarının xatirəsi Bakı şəhər Baş Polis Idarəsində də böyük ehtiramla anılmışdır.
Yanvarın 19-da keçirilən, faciənin 25-ci ildönümünə həsr edilən mərasimin iştirakçıları əvvəlcə faciə qurbanlarının xatirəsini bir dəqiqəlik sükutla yad etdilər.

 

Mərasimdə çıxış edən Baş Idarənin rəisi, polis general-mayoru Mirqafar Seyidov 20 Yanvar faciəsini xalqımızın azadlıq mübarizəsinin bir nümunəsi kimi qiymətləndirdi. Xüsusi olaraq vurğulandı ki, milli azadlıq, ölkənin ərazi bütüvlüyü uğrunda mübarizəyə qalxmış dinc əhaliyə silahlı divan tutulması, yüzlərlə günahsız insanın qətlə yetirilməsi və yaralanması totalitar sovet rejiminin süqutu ərəfəsində onun cinayətkar mahiyyətini bütün dünyaya bir daha nümayiş etdirdi.

Tədbirdə Baş Idarə rəisinin şəxsi heyət üzrə büyük küməkçisi, polis polkovniki Əli Vəliyev 20 Yanvar hadisələrinin səbəbləri və dərsləri, Azərbaycan xalqının azadlıq mübarizə sində oynadığı rol barədə geniş məruzə ilə çıxış etdi. Qeyd olundu ki, həmin qanlı hadisələr öz azadlığına və müstəqilliyinə can atan xalqımızın mübarizliyini və məğrurluğunu nümayiş etdirən bir qəhrəmanlıq salnaməsidir. Diqqətə çatdırıldı ki, Qanlı Yanvar faciəsinə məhz ulu öndər Heydər Əliyevin təşəbbüsü və rəhbərliyi ilə siyasi-hüquqi qiymət verilib.

 

20 Yanvar faciəsinin ertəsi günü uzaq Moskvada xalqının harayına ilk səs verən ümummilli liderimiz Heydər Əliyev oldu. 1990-cı il yanvarın 21-də, o zaman Moskvada yaşayan ulu öndər həyatını təhlükə qarşısında qoyaraq Azərbaycanın Moskvadakı Daimi Nümayəndəliyinə gəldi. Baş vermiş faciə ilə əlaqədar xalqımıza başsağlığı verdi və başda Mixail Qorbaçov olmaqla Bakıdakı terror aktının təşkilatçısı olan sovet hakimiyyəti nümayəndələrini cinayətkar, hərbiçilərin dinc əhaliyə tutduğu divanı bütöv bir xalqa qarşı edilən tarixi cinayət adlandırdı.

 

 

Anım mərasimində vurğulandı ki, Azərbaycan tarixinin həm şanlı, həm də qanlı səhifələri daim yad edilməli, nəsillərdən-nəsillərə ötürülərək unudulmamalıdır. 20 Yanvar faciəsi zamanı göstərilən qəhramanlıq, şücaət, xalq birliyi və həmrəyliyi hər bir azərbaycanlı üçün örnək olmalıdır!